សូមអរគុណសំរាប់ការចូលអាន និង ជួយចែកចាយបន្ត នេះជាកំលាំងចិត្តឲ្យពួកយើងមានទឹកចិត្តខំស្រាវជ្រាវបន្ថែម ^^
ប្រសិនបើស្ត្រី
មាតាមានអារម្មណ៍ឆេវឆាវ តប់ប្រមល់ រាងកាយ នឹង បញ្ចេញសារធាតុអាទ្រីណាលីនច្រើនឡើង ជាហេតុធ្វើឲ្យបេះដូងកូន ប្រឹងស្រូបឈាមកាន់តែខ្លាំង សម្ពាធឈាមឡើង សាច់ដុំកាន់តែរឹង រីឯម្តាយទទួលទានមិនបាន ដេកមិនលក់ ភ្ញាក់ញឹកញាប់ ធ្វើឲ្យសារធាតុដែលត្រូវបញ្ជូនទៅចិញ្ចឹមទារកបាត់បង់ភាពរលូន ។ ផលដែលទទួលបាន គឺទារកមានខ្លួនតូច ឆាប់ឆេវឆាវ ពិបាកចិញ្ចឹមថែទាំ កើតមិនគ្រប់ខែ ។
ដូច្នេះមាតា គួរចេះគ្រប់គ្រងអារម្មណ៍ខ្លួនឯង ដើម្បីជួយបង្កើន IQ ដល់កូនដែលកំពុងនៅក្នុងផ្ទៃ ។ អ្វីដែលធ្វើឲ្យស្ត្រីជាមាតា មានអារម្មណ៍ងាយប្រែប្រួលមិនទៀងទាត់ ម្តងរីករាយ ម្តងមួម៉ៅ ទាំងអស់នេះមានដើមចមពីភាពប្រែប្រួលអ័រម៉ូន ក្នុងរាងកាយ ដូច្នេះអ្នកមិនគួរខ្វាយខ្វល់ពេកនោះទេ ។ អ្វីដែលអ្នកគួរធ្វើ គឺព្យាយាមបង្កើតអារម្មណ៍សេចក្តីសុខ គិតតែផ្លូវល្អដូចខាងក្រោម៖
*ធ្វើការងារកំប៉ិចកំប៉ុក: សាកល្បងនឹកដល់ការងារ ដែលចង់ធ្វើហើយមានសេចក្តីធូរស្រាលក្នុងអារម្មណ៍ដូចជា ការថតរូប គូររូបភាពផាត់ពណ៌ ចាក់អាវ ឬ ការដេរប៉ាក់ជាដើម ។
*ដើរផ្សារ: ការដើរមើលរបស់របរ ទិញរបស់ដែលចូលចិត្ត ចាត់ទុកថា ជាការបង្កើតអារម្មណ៍ភ្លើតភ្លើនបំផុត តែហាមដើរពេញមួយថ្ងៃ ជាពិសេសជ្រើសទីតាំងមនុស្សមិនច្រើនពេក និង គ្មានសំឡេង លាន់ឮ ខ្លាំង ។
*ទស្សនាភាពយន្ត ស្តាប់បទចម្រៀង: ចូលទស្សនាភាពយន្ត ដោយជ្រើសរើសកន្លែងអង្គុយ កុំឲ្យប្រឈមនឹង សម្លេងខ្លាំងពេក ឬ ក៏អាចទស្សនានៅផ្ទះ តាមរយៈបន្ទះ VCD ឬ ច្រៀងខារ៉ាអូខេនៅផ្ទះក៏បាន។
*កែសម្ផស្ស: ទោះបីអ្នកក្លាយទៅជាស្ត្រីមានផ្ទៃពោះហើយក្តី ក៏នៅតែអាចកែសម្ផស្ស បានដូចមុនពេលពពោះដដែល តែគួរជ្រើសរើសប្រភេទតាមបែបធម្មជាតិ ចៀសវាងការប្រើប្រាស់សារធាតុគីមី ។
*ការជួបជុំ: សាកល្បងណាត់ស្វាមី ឬ មិត្តភក្តិទទួលទានអាហារនៅក្រៅផ្ទះ តែប្រសិនបើមានចំណូលចិត្តធ្វើម្ហូបអាចណាត់មិត្តភក្តិ បងប្អូនមកធ្វើម្ហូបទទួលទាន ជួបជុំគ្នាក៏បាន ៕
0 comments:
Post a Comment